Heb 8 | BEF | STEP | Ka noluna yamofihi legeya'a ma luto ni'ibe. Lali'i mamufa gilata bo sipi bo ai ifoga kokulumagu Hu'mamofihi koli'a hiti kefa hisalo maha'aluga yahi lamaga'aga mino moloto nohibe.

Hebrews 8

Yesu sipi mamufa gilata bo yabe

1 Ka noluna yamofihi legeya'a ma luto ni'ibe. Lali'i mamufa gilata bo sipi bo ai ifoga kokulumagu Hu'mamofihi koli'a hiti kefa hisalo maha'aluga yahi lamaga'aga mino moloto nohibe. 2 Ai sipi hetofa mono nohi ni'inaya ya'mamofihi nonugu mono yahusabe lamana'a lali kumu yabe luto Hu'mamofitoga kaga lulata nohina nasanauba mamufa gilata foya lolo nohibe. Mono yahusabemofihi lamana'a bona'magita gi'ohuta ni'igopa Sipi Bouba ai'a li huto hu'ehina ni'ibe.

3 Le'mo mamufa gi emilata bo asaga'naloga enali gomolu nose'na to fato nose'na laita hilata nehabe lite keheli eto hi'ahana. Yana'mu lali mamufa gi emilata bo Yesu ai hiti Hu'mamofihi lokiya fi emi'ehinalo mino'ehina ya nohibe. 4 To metoga Moseu keya ka lu'ehina ka'amofihi mamufa gilata bona'i enali fa'mene nehanamo ni'inaya yata'isi melugu mino'ehina ni'itita mamufa gilata bo meminatine. 5 Enali foya'ani tafa nopofihi babeyafana ya suhi hite anagu lolo hilata nehabe to legeya'a ya'ma kokulumagu ni'ibe. Ana suhi huto Moseu ai mono kamofihi go nohi gilube luto nohigo Hu'mau ma luto lu emi'ehina:Keheli'ohubo. Kosagu babeyafa'a kelepi'ohunamo ana suhi huto ana'ina silaga'i lolo hubo, luto lu eto'ehina yabe. 6 To lu mu tifise'namofihi kaga tito ya'ma ai'a lu'ehina kaga sipi'a huto ti'ehina yanauba lukesa yafa'a lolo hu etago li huto hu'ehinamo ni'inaya go nohi gilina'mu ya luto lu eto'ehina ni'inaya yamofihi Yesu ai'a Hu'ma hiti bona'i hiti enele'mo hepilube luto lu mu tifi'ehina kaga kosaba'i yauba tito ya'ma ni'ibe. Ana suhi huto lokiya fi emilata foya ai'a lilata nohinamo yamofihi tito enali'ani foya'ani be ligi'ehinagi li hetofa huto hilina'mu yamofihi kaga lu molo'ehina kosaba'i huto yamofihi hetofana huto hilinagihe.

7 Koyapa'a lu mu tifise kaga mino'ehina yamofihi hetofa legeya'a ho'ehinalo ni'itita alihi mone huto hilibe luto kaga'a huto mehitine. 8 Ya hu'ehinaya Hu'mau ai ya'ma Yuta bona'magi kumu kehelina bebe mesago ka'a ma luto lu'ehina ya'ma mono bukugu ma lite fayahi keye'ahanamo ni'ibe:

Minoto kana monelugu
ya'ma Isilaeli bona'i to Yuta naga'i
enali hiti lu mu tifise ka kosaba'i
mone li huto hu epilube,
yamofihi Sipi Bouba luto lu'ehina ni'ibe.

Kosaba ka lu molo'ohunamofihi

koyapa'i afo'anigihi

Iyipi metogati enele'mo alube luto

enayato li'ohuna kana'a

enali hiti lu mu tifise'namofihi ka'a

lu molo epolo'ohunamo meni'ibe.

Enali lu mu tifise ka'amofihi

komopa'agu le'mo fotogo hite meminago

nani'ni bu goloto

ahe'mi epolo'ohunamo ni'ibe,

Sipi Bouba ai'a ya'ma luto nolibe.

Koyapa kana'a bulago

alihi Isilaeli bona'i

enali hiti ma luto

ka'a lu mu tifilube'mu nohube luto

Sipi Bouba lu'ehibe.

To nani lu laga huse kaga'ni

enegekesagu melenogo'ni minalina'mu yabe.

Ya huloto komopa'anigu

fayahi koyo melenogo minalibe.

To nani Hu'ma'anifita lolo huto minalugi

enali yagapana'ni lolo hite minalanagihe.

To limite neminana'a lagaso'a

to tite neminana'a sipi bona'magi

enali nani kumu keheli su hete

kehelilanamo ni'inaya,

yamofihi bo moneuba bo lalu'afihi to

bo moneuba falu'afihi:

Kai mele'isi Sipi Bomofihi hapa'a

kehelife lubo, luto ya lu emito

iyo iyo huto lu emilina'mu yabe.

Ya hu'ohuna'mu kehelilune'mu nehabe.

Nani keke'i nolu epoloto enali

li sibi sibi hi'ahana'ani

li he'mi epalaluna'mu yabe.

To foipana'animu aku negekesa mone

mekeheliluna'mu yabe, luto

Sipi Bouba ya lu'ehina yabe.

13 To Hu'mau ai lu mu tifise kaga kosaba'namofi kumu noluto koyapa'i mino'ehina kagamofihi tafa lo'ehibe luto lu'ehina. To ana'ina tafa loloto fulupa ito yamofihi nesi'a minoto su hoto fenene hilina'mu yabe.